1.2.2 Rannsóknaraðferðir við upplýsinga- og gagnasöfnun

Almennt
Í grundvallaratriðum byggist sú aðferð, sem beitt var, á því að greina auðlindir (resources) og hæfnisþætti (competences) og verkefnishugmyndir í anda fyrrnefnds Grants. Galdurinn við að greina ákjósanleg verkefni er að "máta" verkefnishugmyndir við auðlinda- og hæfnisþætti en það er gert með fyrrnefndri "matrixu". Þetta er betur skýrt síðar í skýrslunni.

Tilgangur allra úrvinnslutækja var að auðvelda vinnu við að meta hæfni Eyfjarðarsvæðisins m.t.t. fjar- og gagnavinnslu, styrkleika og veikleika og út frá því forgangsraða verkefnum til áframhaldandi vinnslu til að geta mótað stefnumið fyrir svæðið í fjar- og gagnavinnslu. Þetta er þekkt aðferð en hefur ekki áður verið notuð fyrir Eyjafjarðarsvæðið og ekki er vitað til þess að aðferðinni hafi verið beitt í svipuðum tilgangi á öðrum atvinnusvæðum á landinu.

Helstu rökin fyrir beitingu ofangreindra aðferða er að lágmarka huglægt mat eins og kostur er og auka marktækni niðurstaðna með því að beita skipulagðri aðferðafræði.

Við greiningarhluta verkefnisins og öflun upplýsinga og gagna var í senn gerð s.k. skrifborðsathugun (desk research) og vettvangsrannsókn (primary data research).

Skrifborðsathugun
Tilgangur með að setja saman stýrihóp var einmitt til að hafa innan seilingar aðgang að þekkingu og upplýsingum til að lágmarka þörf fyrir öflun upplýsinga annars staðar frá.
Skrifborðsathugunin fólst í því að teknar voru saman og yfirfarnar skýrslur sem taldar voru hjálpa við framkvæmd og úrvinnslu verkefnisins, sem og önnur opinber og óopinber gögn.
Skrifborðsathugunin var gerð til að lágmarka þörfina fyrir öflun upplýsinga með vettvangsrannsókn. Í ljós kom að litlar samanburðarhæfar upplýsingar voru til um stöðu Eyjafjarðarsvæðisins í fjar- og gagnavinnslu. Hins vegar kom í ljós að hugmyndir um atvinnumöguleika á sviði fjar- og gagnavinnslu eru ekki nýjar af nálinni því frá árinu 1990 hafa menn velt þessum möguleika fyrir sér.

Vettvangsrannsókn
Tvær leiðir voru farnar til að afla upplýsinga á vettvangi um stöðu Eyjafjarðarsvæðisins m.t.t. fjar- og gagnavinnslu.

Annars vegar voru skipulögð ítarleg viðtöl (depth interview) sem tekin voru við valda einstaklinga sem gátu gefið lýsandi mynd af stöðu svæðisins. Hins vegar var búinn til óformlegur spurningalisti með tveimur opnum spurningum sem sendur var til nokkurra einstaklinga á svæðinu til að fá sem víðasta mynd af styrk- og veikleikum svæðisins í fjar- og gagnavinnslu.

Ennfremur var ákveðið að setja tvær spurningar um tölvueign og tölvunotkun í svokallaðan Akureyrarspurningavagn á vegum Ráðgarðs-Gallup sem unninn var um svipað leyti og þetta verkefni.

Atvinnuþróunarfélag Eyjafjarðar - Strandgötu 29 - 600 Akureyri
Sími 4612740 - Fax 4612729 - Netfang: - Veffang: afe.is