|
|||
|
2.1.1 Mikilvægi sameiginlegrar stefnumörkunar Fjar- og gagnavinnsla er ekki verkefni eins sveitarfélags, fyrirtækis eða stofnunar innan Eyjafjarðar. Ef byggja á upp atvinnutækifæri með hagnýtingu fjar- og gagnavinnslu þá er nauðsynlegt að sveitarfélög innan Eyjafjarðarsvæðisins fylki liði á bak við sameiginlega stefnu um hvernig nýta á fyrirliggjandi möguleika. Að öðrum kosti er erfitt að nýta sér núverandi styrkleika og tækifæri sem geta snúist upp í andhverfu sína ef ekki er rétt haldið á spilunum. Ljóst er að innan ýmissa fyrirtækja, skóla og stofnana á svæðinu er til þekking, tækjakostur og tæknibúnaður sem augljóslega er styrkur fyrir svæðið til uppbyggingar á fjar- og gagnavinnslu. Á meðan að forsvarsmenn sveitarfélaga, fyrirtækja og stofnana sameinast ekki um leiðir um þróun þessara þátta, þá er ólíklegt að svæðið í heild sinni nái tilskyldum árangri í hagnýtingu auðlinda fyrir fjar- og gagnavinnslu. Á s.l. árum og jafnvel áratugum hafa verið unnin nokkur umfangsmikil verkefni til stefnumótunar í atvinnumálum á svæðinu. Það er varla ofsögum sagt að skilgreindum markmiðum og leiðum úr verkefnunum hafi ekki verið fylgt nægilega vel úr hlaði. Það er alltaf hættan þegar ekki næst samstaða um stefnumótunina og menn tileinka sér ekki víðsýnt, þróandi og sveigjanlegt hugarfar. Að týna sér með áralanga rörsýn á stóriðju og/eða matvælaiðnað, sem bjargvætt í atvinnumálum, gengur ekki, þó ekki sé verið að gera lítið úr þeim hugmyndum. Á meðan sjónarhornið er þröngt er alltaf hætta á því að önnur tækifæri gangi mönnum úr greipum. Ljóst er að þetta má ekki gerast ef nýta á tækifæri í fjar- og gagnavinnslu sem byggja á tækni sem er í sífelldri þróun. Sveitarfélög í Eyjafirði þurfa að taka stefnumarkandi ákvörðun um hvort og/eða hvernig þau vilja byggja upp atvinnutækifæri með notkun upplýsingatækninnar. Það er ekki nægilegt að segjast hafa yfir ákveðnum auðlindum að ráða og vera hæfur til þess að nýta auðlindir ef orðin eru án athafna. Íslendingar hafa lengi státað af ríkidæmi náttúrulegra auðlinda, enda lengi byggt grunnatvinnugreinar á þeim auðlindum. Í dag eru sóknartækifæri annars staðar í kjölfar tækninýjunga sem byggð eru meira á hugviti en handafli. Hugvit er auðlind sem tæplega er hægt að flokka sem náttúrulega og nýtist ekki nema að henni sé hlúð og henni sköpuð skilyrði til að þroskast. Hugvit er undirstöðuauðlind fyrir fjar- og gagnavinnslu og án þekkingar er tæknibúnaður gagnslaus og þýðir þ.a.l. lítið að færa rök fyrir því að flytja eigi verkefni frá höfuðborgarsvæði út á land ef skortur er á þessari auðlind. Með þessum orðum er verið að leggja áherslu á að móta skýra stefnu um uppbyggingu á atvinnumöguleikum, þar á meðal til fjar- og gagnavinnslu og ná sátt um þá stefnu eins og komið var inn á hér á undan. Þar skipta innviðir samfélagsins miklu máli og að þeir séu markvisst ræktaðir til að hægt sé að njóta ávaxtanna. |
|||
|
|
