|
|||
|
6.1.1 Í hverju felst meginhæfni Eyjafjarðar? Hér er fjallað um meginhæfni Eyjafjarðar á almennan hátt en hún byggir m.a. á niðurstöðum SVÓT-greiningar í 4. kafla skýrslunnar. Tekið er fram að einstakar atvinnugreinar voru ekki metnar og því ber ekki að túlka niðurstöðuna hér á eftir á þann veg að horft sé fram hjá núverandi hæfni fyrirtækja og stofnana svæðisins á hinum ýmsum sviðum. Verður hér því einungis drepið á nokkur atriði sem lýsa almennri meginhæfni svæðisins. Með tilkomu Háskólans á Akureyri og samstarfsstofnana hans, er óhætt að fullyrða að meginhæfni svæðisins hafi stóraukist undanfarin ár og komi til með að vera ein lykilforsenda þess að fjar- og gagnavinnsluverkefni verði að veruleika. Því til staðfestingar má nefna að á milli kennslusviða háskólans og atvinnulífsins hefur myndast öflugt samspil sem mun í framtíðinni auka meginhæfni svæðisins. Er hér nóg að nefna tengsl háskólans við heilbrigðisstofnanir og menntastofnanir. Háskólinn á Akureyri styður og örvar atvinnulífið á víðtækan hátt og eykur um leið hæfni atvinnulífsins með því að skapa grundvöll fyrir þróun þekkingar á svæðinu er grundvöllur þess að hægt verði að koma á laggirnar metnaðarfullum verkefnum á sviðum fjar- og gagnavinnslu. Innan Fjórðungssjúkrahússins hefur eins og fyrr segir, skapast afar verðmæt hæfni og þekking á ákveðnum sviðum læknavísinda, hjúkrunar o.frv., og státar svæðið af mjög öflugri heilbrigðisþjónustu á landsvísu. Þessi hæfni hefur þróast á meðal starfsfólks sjúkrahússins og hefur samspil háskólans og FSA haft þar mikið að segja. Sem dæmi má nefna að nemar í hjúkrunarfræði við Háskólann á Akureyri fá starfsþjálfun sína á FSA og Heilsugæslustöðinni á Akureyri og eiga þar til aðgang að öflugum vinnustað þegar námi lýkur. Þekking í sjávarútvegi er mikil á svæðinu þar sem hér starfa tvö af öflugustu og þróuðustu sjávárútvegsfyrirtækjum landsins, ÚA og Samherji, ásamt fleiri matvælafyrirtækjum á sviðum fiskvinnslu. Hér gildir líka að sterkt samspil er á milli menntastofnana svæðisins, sjávarútvegsdeildar háskólans, Útvegssviðs VMA á Dalvík og sjávarútvegssfyrirtækja á svæðinu. Almenn hæfni, í formi sérfræðiþekkingar, í tölvu- og upplýsingatækni hefur aukist mikið undanfarin ár og starfa á svæðinu nokkuð mörg fyrirtæki á þessu sviði. Segja má að hæfni af því tagi sem fjallað er um hér að ofan, sé mikilvægt að skerpa og efla til að mynda megi gott samkeppnisforskot á þessum sviðum, en fjallað er um samkeppnisforskot hér á eftir. Framangreinda meginhæfni, sem og aðra, má m.a. efla með því að hagnýta sér tækifæri sem felast í fjar- og gagnavinnslu. Eins og kemur fram í 4. kafla skýrslunnar, var svæðið aðallega metið út frá auðlinda- og hæfnisþáttum fyrir fjar- og gagnavinnslu þar sem markmiðið var m.a. að fá vitneskju um almenna styrkleika og veikleika svæðisins til að geta hagnýtt tækni fjar- og gagnavinnslunnar og þeirrar þekkingar sem er til staðar á svæðinu. Þrátt fyrir að þar komi fram að tæknileg atriði varðandi fjar- og gagnavinnslu, sérfræðiþekking og þekking í tölvufræði og upplýsingatækni séu taldir til veikleika svæðisins, þá eru menntastofnanir og fyrirtæki á þessum sviðum samt hluti af meginhæfni svæðisins, þar sem þau eru til staðar og er hægt að efla þau og bæta. Tekið skal fram að skýrsluhöfundar eru meðvitaðir um það að svæðið er hæft á fleiri og/eða komi til með að geta þróað meginhæfni á öðrum sviðum en hér eru nefnd, ekki síst á sviði ferðamála.
|
|||
|
|
