|
3.1.2
Ný fjarskiptalög
Byltingin
í fjarskiptum er talin vera eitt það mikilvægasta
sem er að gerast í atvinnulífi þjóða
heims um þessar mundir. Þess vegna er mikilvægt
að setja skynsamlegan lagaramma um þennan þátt
atvinnulífsins.
Breytingar
á tækni, þjónustu og alþjóðlegu
lagaumhverfi fjarskipta ásamt auknum umsvifum fjarskipta-
og upplýsingatækni og nýjum skuldbindingum samkvæmt
samningnum um Evrópska efnahagssvæðið, hafa
gert endurskoðun fjarskiptalaga nauðsynlega. Þó
eru gildandi fjarskiptalög varla orðin fjögurra ára
gömul.
Samgönguráðherra
hefur lagt fram frumvarp til nýrra fjarskiptalaga á
Alþingi. Með nýjum fjarskiptalögum er alþjónusta
endurskilgreind í 13. grein laganna samkvæmt eftirfarandi:
"Til
alþjónustu teljast m.a. talsímaþjónusta,
þjónusta við fatlaða eða notendur með
sérstakar þjóðfélagsþarfir
og gagnaflutningsþjónusta með 128 Kb/s flutningsgetu
sem notendur tengjast um heimtaugar almenna talsímanetsins".
Í
athugasemdum með frumvarpinu segir að það hvíli
á tveimur meginstoðum. Annars vegar sé í
því að finna ákvæði sem eigi að
stuðla að aukinni samkeppni og tryggja aðgang allra
landsmanna að ákveðinni lágmarksþjónustu,
svokallaðri alþjónustu, en í frumvarpinu
er í fyrsta skipti lagt til að gagnaflutningsþjónusta
verði skilgreind sem alþjónusta. Hér séu
nýmæli á ferð sem geti haft mikla þýðingu
fyrir búsetu, atvinnuuppbyggingu og lífskjör
í landinu. Hins vegar sé með frumvarpinu verið
að laga íslenska löggjöf að þeim
tilskipunum sem gilda á Evrópska efnahagssvæðinu
um fjarskiptamál.
"Mikil
umskipti hafa orðið í fjarskiptamálum í
heiminum á undanförnum árum, bæði
í tækni, þjónustu og lagasetningu. Segja
má að þróun síðustu ára
hafi gerbreytt hefðbundnum fjarskiptum, þráðlaus
samskipti setja mark sitt á talsamband, gjald fyrir millilandasamtöl
fer lækkandi og samruni fjarskipta, fjölmiðlunar
og einkatölva hefur byltingarkennd áhrif. Samskipti
framtíðarinnar munu að miklu leyti byggjast á
gagnaflutningum, svo sem fjarvinnslu, fjarmenntun, fjarlækningum,
heimabönkum og gagnvirku sjónvarpi," segir meðal
annars í frumvarpinu. "Fjarskipta- og upplýsingamál
skipta Íslendinga höfuðmáli. Markmiðið
er því að Ísland verði í fremstu
röð tæknivæddra ríkja með ódýra
og góða fjarskiptaþjónustu. Alþingi
og stjórnvöld bera ábyrgð á því
að tryggja réttlátar leikreglur í fjarskiptamálum,
leikreglur sem stuðlað geta að aukinni velferð
og hagsæld í þjóðfélaginu.
Leikreglur fjarskiptanna eru um margt frábrugðnar leikreglum
annarrar atvinnustarfsemi vegna þeirrar sérstöðu
fjarskipta í Evrópu að þau voru fyrst
fyrir fáum árum leyst undan einkaréttarvernd
og því er ekki talið tímabært að
fella ákveðna þætti fjarskiptaþjónustu,
svo sem samtengingu, reglur um opinn aðgang að netum og
alþjónustu undir almenna samkeppnislöggjöf.
Má nefna tvö dæmi því til sönnunar.
Mikilvægi þess að notendur geti auðveldlega
haft samskipti á milli fjarskiptaneta hefur haft áhrif
við setningu reglna sem gilda á Evrópska efnahagssvæðinu
hér að lútandi. Annað sérkenni fjarskipta
er að ríkisreknar símastjórnir áttu
og ráku eina fullkomna fjarskiptanetið sem til var
þar til einkaréttur var afnuminn með lögum.
Hinar sérstöku reglur sem um fjarskipti gilda í
Evrópu eiga að stuðla að aukinni samkeppni
með því að gera nýjum fyrirtækjum
kleift að hefja starfsemi á markaðnum,"
segir einnig í frumvarpinu.
Frumvarpinu
er ætlað að örva samkeppni á þessu
sviði og jafnframt að tryggja aðgang allra landsmanna
að gagnaflutningsþjónustu, auk talsímaþjónustu,
sem kveðið er á um í gildandi lögum.
|
