|
|||
|
3.2.2 Ađgangsnet Landssímans Aðgangsnet Landssímans er byggt upp af tveimur megin þáttum; koparkerfinu sem sett var upp fyrir hefðbundna símaþjónustu og breiðbandskerfinu sem verið er að setja upp til að mæta kröfum framtíðarinnar. Koparkerfið er byggt upp af stofnstrengjum með allt að 1000 línum sem lagðir eru út í greinikassa þar sem strengir með færri línum taka við. Strengirnir liggja að lokum inn í götukassa eða fjölbýlishús þaðan sem einstaka línur liggja til íbúðanna. Þetta er sýnt til glöggvunar á myndinni hér að neðan. Breiðbandskerfið er byggt upp til leysa koparkerfið af hólmi þegar fram líða stundir og koparkerfið mun ekki geta annað fjarskiptaþörfum almennings og fyrirtækja. Breiðbandskerfið byggir á því að lagðir eru ljósleiðarar frá símstöðvum út í götuskápa. Í götuskáp er greiningarbúnaður sem breytir ljósi yfir í rafmerki og er kóax strengur notaður seinasta spölinn til notenda, allt að 300 m. Jafnframt er í undirbúningi að leggja ljósleiðara frá götuskápum og alla leið heim til notenda í einbýlis og raðhúsum. Þegar eru lagðir ljósleiðarar í fjölbýlishús og til stærri fyrirtækja. Fyrirkomulag breiðbandskerfisins íslenska er nefnt FTTC (Fibre To The Curb) og er sýnt á mynd 3.4 á næstu síðu. Í gegnum tíðina hafa símafyrirtæki lagt meira fé í aðgangsnetin en nokkurn annan lið. Því skiptir miklu að geta nýtt fjárfestinguna sem lengst. Hér kemur DSL tæknin til hjálpar því með henni er unnt að flytja breiðbandsmerki á koparkerfi með allt að 8 Mb/s hraða heim til notenda. Þessi lausn mun væntanlega duga nokkuð fram á fyrsta tug nýrrar aldar en þá verður óhjákvæmilegt annað en að flytja merkin með ljósleiðara mestan hluta leiðarinnar. Þegar er komin fram lausn sem hentar vel fyrir núverandi fyrirkomulagi breiðbands Landssímans en hún er nefnd VDSL. Ljósleiðari ber merkin frá símstöð til götuskáps þar sem VDSL búnaðurinn breytir þeim í rafmerki og notast við koparlínu seinasta hluta leiðarinnar. Með þessu móti er hægt að flytja allt að 60 Mb/s heim til notenda. |
|||
|
|
