|
|||
|
3.4.3 Er verðlagning Landssímans hindrun fyrir landsbyggðina? Allt tal um mikilvægi upplýsingatækni fyrir byggðaþróun er til lítils ef ekki er gætt jafnræðis við verðlagningu á gjöldum fyrir not á tækninni. Eins og sjá má á dæmunum um Frame Relay tengingu er kostnaðarlegur munur á stofn- og mánaðargjöldum enginn, en á 2 Mb/s sýndarrás upp á kr. 135.900 á tengingu á milli Akureyrar og Reykjavíkur og aðila innan Reykjavíkur. Eins og sjá má á dæmunum um leigulínur er kostnaðarlegur munur á bæði stofngjöldum og mánaðargjöldum innan aðila í Reykjavík eða milli Reykjavíkur og Akureyrar. Munurinn á stofngjöldum er kr. 150.431, en á mánaðargjöldum kr. 209.198, og samtals kr. 359.629. Hér er því um umtalsverðan mismun að ræða, sem hlýtur að skipta miklu máli hvað varðar rekstrarlega og samkeppnislega stöðu fyrirtækja, sem eru að keppa á sama markaði. Af ofansögðu er ljóst að mögulegur flöskuháls fyrir þróun fjar- og gagnavinnslu á landsbyggðinni, er m.a. nokkuð óheppileg verðlagning Landssíma Íslands á gagnaflutningsþjónustu fyrir landsbyggðina. Ef þessu verður ekki breytt verður gífurlega erfitt fyrir fyrirtæki á landsbyggðinni að standast samkeppni við sambærileg fyrirtæki á höfuðborgarsvæðinu nema ríkið geri þeim það fjárhagslega kleift í formi peningalegra byggðaaðgerða. Samgönguráðherra, Sturla Böðvarsson, hefur lýst því yfir að hann leggi mikla áherslu á að sköpuð verði skilyrði til þess að fyrirtæki á landsbyggðinni geti keppt á jafnréttisgrundvelli á þessu sviði. Þrátt fyrir það er verðmunurinn enn alltof mikill og ljóst að meira þarf að koma til hjá samgönguráðherra. |
|||
|
|
