|
||||
|
4.4.1 Opnar spurningar Eins og komið hefur fram voru sendar tvær opnar spurningar til valinna aðila á Eyjafjarðarsvæðinu. Því miður höfðu alltof fáir áhuga á því að svara spurningunum þrátt fyrir ítrekaðar óskir um fleiri svör. Spurningarnar voru eftirfarandi:
Hér á eftir er drepið á atriði sem komu fram hjá þeim sem svöruðu, sem flestir eru í stjórnunarstöðum í fyrirtækjum og stofnunum á Eyjafjarðarsvæðinu. Heilt yfir má segja að svörin séu í takt við niðurstöðu stöðumats á auðlinda- og hæfnisþáttum. Dæmi um það sem menn nefndu sem styrkleika svæðisins var stöðugt vinnuafl og að þar væri gott að búa. Einnig komu ábendingar um að svæðið hefði enga sérstaka yfirburði fram yfir önnur landssvæði. Hvað varðar veikleika eða hindranir á svæðinu komu fram atriði á borð við þekkingu og menntun. Einnig nefndu menn kostnað sem hindrun fyrir svæðið með tilvísun í gjaldskrá Landssímans á leiguverði á leigulínum. Það atriði var einnig ofarlega í huga þeirra sem tekið var viðtal við enda eðlileg hindrun fyrir fjar- og gagnavinnslufyrirtæki á landsbyggðinni að öllu óbreyttu. Annað athyglisvert sem kom í ljós úr svörunum er að menn nefndu atriði eins og almennt viðhorf Eyfirðinga, vantrú á eigin getu og hæfni og of mikla einblíni á yfirfærslu starfa frá höfuðborg til landsbyggðar án þess fólk gerði sér nægilega grein fyrir því hvort um virðisaukandi starfsemi sé að ræða eða ekki. Þetta staðfestir á vissan hátt þá umræðu sem farið hefur fram á landsbyggðinni um nauðsyn þess að flytja störf á vegum hins opinbera frá höfuðborg til landsbyggðar, störf sem sum hver hafa lítil áhrif út frá sér í samfélagið önnur en að skapa fólki atvinnu. Það má hins vegar ekki horfa neikvætt á þennan þátt því tæknin í fjar- og gagnavinnslu gerir það kleift að ekki skiptir máli hvar störfin eru unnin, sem eðlilega eru ein stærstu rökin fyrir landsbyggðarsvæði til að skapa ný störf. Þau sjónarmið komu fram hjá fleirum að nauðsynlegt sé að taka með í reikninginn hvaða önnur skilyrði séu fyrir hendi í samfélaginu sem hvetji fólk til að flytja til Eyjafjarðarsvæðisins, þ.e. traustur grundvöllur í menntun, menningu og félagslífi. "Þetta er ekki bara spurning um að flytja fólk á milli staða og setja það framan við tölvu". Ljóst er að ef miðað er við viðbrögð hjá þeim sem rætt var við í formlegum viðtölum, og hjá þeim sem svöruðu opnum spurningum, þá verður mönnum tíðrætt um mikilvægi þess að stuðla að uppbyggingu þekkingariðnaðar á Eyjafjarðarsvæðinu. Takist það ekki verði erfitt að bjóða fólki með sérfræðimenntun sömu launakjör og þekkist á höfuðborgarsvæðinu. Þekkingu þurfi að skapa og þróa á svæðinu og öll skilyrði séu á svæðinu til að skapa þann grundvöll. Til þess þarf skýra framtíðarsýn og stefnu og að henni verði fylgt eftir. Fjárfestingin í menntun á svæðinu þarf að skila sér í aukinni þekkingarlegri stöðu innan svæðisins. Þetta er stórt vandamál fyrir minni byggðarlögin á svæðinu, sem sjá á eftir ungu fólki að leita sér menntunar sem hafa í engin hús að venda í sinni heimabyggð að loknu námi þar sem engin atvinnutækifæri eru til að nýta þekkinguna. Samandregið voru svör svarenda úr opnum spurningum frekar í samræmi við niðurstöðu stöðumatsins og ef eitthvað er bættu þau upp rökstuðninginn fyrir ályktanir sem þar eru dregnar.
|
||||
|
|
