|
||||||||||||||||||
|
5.1.2. Síun og val verkefnahugmynda Í skýrslu ITÍ voru alls skilgreindar 211 verkefnahugmyndir. Frá upphafi var ákveðið að taka ekki til skoðunar verkefni sem féllu í A flokk. Við það minnkaði hugmyndabankinn í 165 hugmyndir. Augljóst var að ómögulegt yrði að taka til skoðunar 165 verkefnahugmyndir og nauðsynlegt að fækka í hugmyndabankanum. Áður en það var gert var þátttakendum stýrihóps gefinn kostur á því að bæta við verkefnahugmyndum og var það gert með hugarflugi. Frekari síun á hugmyndum fór fram, samhliða mikilvægisgreiningu á samskonar hátt og síun auðlinda- og hæfnisþátta. Áður en það var gert var búið að sía út verkefnahugmyndir sem þóttu vera svipaðar hvorri annarri í hugmyndabanka úr skýrslu ITÍ. Að þessu loknu voru 117 verkefnishugmyndir eftir sem fóru áfram í mikilvægisgreiningu og frekari síun. Mikilvægisgreiningin var framkvæmd með sömu aðferð og mikilvægisgreining auðlinda- og hæfnisþátta og var framkvæmd á meðal þátttakenda stýrihóps. Að þessu sinni þurftu þátttakendur að gefa verkefnihugmyndum stig á bilinu 1 - 25 (25 mikilvægast og 1 minnst mikilvægast). Tilgangur mikilvægisgreiningar var í fyrsta lagi að greina mikilvægustu verkefnin og þar með fækka í hugmyndabankanum og í öðru lagi að gefa verkefnishugmyndum hlutfallslegt vægi fyrir úrvinnslu tengslarits. Í mikilvægisgreiningu og síun fengu 45 verkefnishugmyndir stig, þ.a.l. féllu út 72 verkefnishugmyndir. Í töflu 5.2 á næstu síðu sést hvernig verkefnin röðuðust eftir mikilvægi, samkvæmt mikilvægisgreiningunni. Fyrsti dálkurinn í töflunni sýnir í hvaða flokki viðkomandi verkefni er, eins og útskýrt var í kafla 4.3.1 hér á undan. Fyrst er sýnd flokkun verkefna eftir fjölda og uppsöfnuðu hlutfallslegu mikilvægi.
Það er athyglisvert að fjöldi verkefna í hverjum flokki að lokinni mikilvægisgreiningu, er í svipuðu hlutfalli og áður en mikilvægisgreining var framkvæmd. Verkefni í flokknum C3 eru talin vera hlutfallslega mikilvægust fyrir Eyjafjarðarsvæðið sem getur verið lýsandi fyrir metnaðinn fyrir hönd svæðisins. Þetta eru verkefni sem þurfa tíma til að þróast og krefjast jafnframt mikillar sérfræðiþekkingar ef þau eiga að komast á legg og stuðla að frekari nýsköpun í atvinnulífinu. Annað sem er athyglisvert er að svokölluð yfirfærsluverkefni, þ.e. verkefni sem hægt er að flytja frá höfuðborgarsvæðinu út á landsbyggðinina, voru ekki talin eins hlutfallslega mikilvæg og þróunarverkefni eða nýsköpunarverkefni. Ennfremur er athyglisvert hversu fá þjónustuverkefni voru valin en það eru verkefni sem hægt er að koma á með töluvert minni tilkostnaði en önnur. Rétt er þó að endurtaka að verkefni í A flokki voru ekki tekin með í greininguna. Undir þann flokk falla t.d. verkefni sem núverandi starfsstöðvar Íslenskrar miðlunar í Ólafsfirði og Hrísey hafa stefnt að því að sinna. Það virðast því vera skýr skilaboð í gegnum mikilvægisgreininguna að það sé ekki ákjósanlegur kostur að móta stefnu um að byggja fjar- og gagnavinnslu í Eyjafirði á verkefnum sem krefjast lítillar sérfræðiþekkingar og lítils stofnkostnaðar. Bent er á að í viðauka skýrslunnar má sjá lista yfir allar verkefnishugmyndir sem fóru í mikilvægisgreiningu og niðurstöðu hennar. |
||||||||||||||||||
|
|
