5.3.1 Uppbygging og notkun

Bent er á umfjöllun í kafla 1.3.3 um tilgang og grunnuppbyggingu tengslaritsins.

Eins og komið hefur fram er tvívítt tengslarit þekkt vinnuform, þegar markmiðið er að skoða samsvörun á milli tveggja þátta og áhrif þeirra á milli.

Einn aðalkosturinn við tengslaritið er að það er í senn vinnuform og úrvinnsluform og gefur þann möguleika að greina allar niðurstöður strax úr forminu. Annar kostur er að á einu formi er hægt að vinna með margar tegundir upplýsinga sem tengjast. Lykilatriðið er að strax frá upphafi er hægt að greina hvaða möguleikar eru til staðar að taka að sér verkefni á sviði fjar- og gagnavinnslu, hvað vantar upp á fyrir einstök verkefni og hvaða stefnu ber að taka, með tilliti til forgangsröðunar verkefna.

Notkun og mat á tengslum
Myndin af tengslaritinu lýsir best notkuninni. Lárétt er listi yfir auðlinda- og hæfnisþætti ásamt hlutfallslegu mikilvægi þeirra. Lóðrétt eru verkefnishugmyndir. Neðst eru mælikvarðar og útreikningur fyrir verkefnishugmyndir en á hægri hlið tengslaritsins eru niðurstöður fyrir auðlinda- og hæfnisþætti, þ.e. niðurstöður stöðumats og um leið SVÓT-greining.

Notkunin fer þannig fram að merkja þarf tengsl á milli auðlinda- og hæfnisþátta og verkefnishugmynda. Í þessu verkefni fór vinnan þannig fram að allir þátttakendur stýrihóps fengu tækifæri til að meta tengslin á milli auðlinda- og hæfnisþátta og verkefnishugmynda. Þátttakendur voru látnir meta tengsl á almennan hátt og út frá eigin sýn og þekkingu. Niðurstöðum frá þátttakendum var blandað saman í eitt tengslarit og litið svo á að sammæli hefði náðst og búið væri að koma í veg fyrir að mat á tengslum væri einstrengislegt og skorti heildarsýn. Þátttakendur stýrihóps mátu einnig tæknilega örðugleika, kostnað og möguleika á framkvæmd samkvæmt fyrrgreindum mælikvarða.

Úrvinnsla (greining niðurstaðna)
Tengslaritið gefur margs konar upplýsingar og niðurstöður. Megintilgangur notkunar og úrvinnslu tengslamyndarinnar í þessu verkefni snerist um tvennt. Annars vegar að meta, greina og forgangsraða verkefnum til áframhaldandi vinnslu og hins vegar að meta auðlindir og hæfni Eyjafjarðarsvæðisins í fjar- og gagnavinnslu út frá niðurstöðu SVÓT-greiningar.

Greind var niðurstaða á verkefnum úr hverjum verkefnisflokki samkvæmt fyrri útskýringum. Verkefnum er forgangsraðað út frá niðurstöðum útreiknings í hverjum verkefnisflokki. Markmiðið var að greina efstu verkefnin í hverjum flokki sem tillögur um verkefni sem leggja beri áherslu á að koma á laggirnar á Eyjafjarðarsvæðinu. Síðan eru verkefnin valin eftir því hve mörg stig þau fengu úr útreikningum, óháð verkefnisflokkum.

Atvinnuþróunarfélag Eyjafjarðar - Strandgötu 29 - 600 Akureyri
Sími 4612740 - Fax 4612729 - Netfang: - Veffang: afe.is